Get Adobe Flash player

postheadericon Мулоқоти Президент бо муовини Раиси Девони вазирон, вазири корҳои хориҷии Туркманистон

14 июли дар Қасри миллат Асосгузори сулҳу ваҳдати миллӣ-Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон бо муовини Раиси Девони вазирон, вазири корҳои хориҷии Туркманистон Рашид Мередов мулоқот намуданд.

Дар мулоқот вазъи кунунӣ ва дурнамои муносибатҳои байнидавлатии Тоҷикистон ва Туркманистон дар соҳаҳои мавриди таваҷҷуҳ баррасӣ шуданд.

Сарвари давлат муҳтарам Эмомалӣ Раҳмон дар оғози суҳбат изҳор доштанд, ки робитаҳои Тоҷикистону Туркманистон дар соҳаҳои гуногун дар сатҳи зарурӣ ба роҳ монда шуда, барои идомаи бобарори онҳо талошу иқдомҳои ҳарду ҷониб бояд васеъ истифода бурда шаванд.

Ҷонибҳо бар он ҳамфикр буданд, ки муносибатҳои судманд ва дӯстии мардумони Тоҷикистону Туркманистон аз қаъри асрҳо сарчашма гирифта, имрӯз муколамаи доимии сиёсӣ ва заминаи қарордодию ҳуқуқии муносибатҳои байнидавлатӣ дар сатҳи зарурӣ нигоҳ дошта шудааст.

Барои тақвияти бештари ҳамкориҳои байнидавлатӣ дар соҳаҳои иқтисоду тиҷорат, татбиқи лоиҳаҳои муштарак дар соҳаи роҳу нақлиёт, аз ҷумла, таъмини доимии робитаи мустақими ҳавоӣ, сохтмони роҳҳои оҳани минтақавӣ, муштаракоти бештар дар соҳаҳои илму маориф ва фарҳангу тандурустӣ зарурияти фаъолгардонии кори Комиссияи байниҳукуматии Тоҷикистону Туркманистон оид ба ҳамкориҳои тиҷоратию иқтисодӣ ва илмию техникӣ, таъмини муколамаи доимии доираи соҳибкорону ширкатҳои давлатӣ, ташкили Шӯрои корӣ ва ифтитоҳи Хонаҳои тиҷоратӣ таъкид карда шуд.

Бо қаноатмандӣ зикр шуд, ки лоиҳаҳои инфрасохтории бузург, ки ҳарду давлат дар татбиқи онҳо иштирок менамоянд омили муҳими рушди устувор ва ҳамгироии бобарор дар доираи минтақа ба ҳисоб мераванд.

Дар мулоқот ҳамчунин масъалаҳои вобаста ба ҳамгироии Тоҷикистону Туркманистон дар доираи ташкилоту созмонҳои минтақавию байналмилалӣ, масоили таъмини амнияту бехатарӣ, мубориза бар зидди терроризму экстремизми байналмилалӣ, гардиши ғайриқонунии маводи мухаддир ва иштироки фаъол дар ба эътидоловарии вазъи сиёсию низомии Афғонистон мавриди баррасӣ қарор дода шуданд.

 

postheadericon Сафари расмии Муовини Раиси Девони Вазирон, Вазири корҳои хориҷии Туркманистон Рашид Мередов ба Ҷумҳурии Тоҷикистон

Бо даъвати ҷониби Тоҷикистон 13 июли соли 2017 Муовини Раиси Девони Вазирон, Вазири корҳои хориҷии Туркманистон Р. Мередов бо сафари расмӣ ба Ҷумҳурии Тоҷикистон ташриф овард.

14 июл дар Вазорати корҳои хориҷии Ҷумҳурии Тоҷикистон мулоқоти хоса бо Вазири корҳои хориҷии Ҷумҳурии Тоҷикистон муҳтарам С. Аслов ва машваратҳои дуҷониба дар ҳайати васеъ доир шуданд.

Дар рафти мулоқот ҷонибҳо оид ба масъалаҳои мубрами рӯзномаи ҷаҳонӣ, вазъ ва дурнамои муносибатҳои дуҷониба, ҳамкориҳои минбаъда дар соҳаи сиёсӣ ва иқтисодию гуманитарӣ, аз ҷумла, энергетика, нақлиёт ва коммуникатсия, тиҷорат, маориф ва фарҳанг табодули афкор намуданд.

Дар анҷоми мулоқот Барномаи ҳамкорӣ байни Вазорати корҳои хориҷии Ҷумҳурии Тоҷикистон ва Вазорати корҳои хориҷии Туркманистон барои солҳои 2018-2019  ба имзо расонида шуд.

 

postheadericon Таҷлили 20-солагии Рӯзи Ваҳдати миллӣ, Рӯзҳои фарҳангии Тоҷикистон ва Соли ҷовонон дар шаҳри Ашқобод

Шоми, 15 июни соли 2017 дар меҳмонхонаи “Йилдиз”-и шаҳри Ашқобод бахшида ба таҷлили 20-солагии Рӯзи Ваҳдати миллӣ, Рӯзҳои фарҳангии Тоҷикистон дар Туркманистон ва Соли ҷовонон, зиёфати расмӣ ва консетри мусиқӣ баргузор гардид.

Дар маъракаи мазкур зиёда аз 150 нафар меҳмонон, аз он ҷумла Муовини Девони Вазирони Туркманистон Аннагелди Гараджаев, намояндагони вазорати корҳои хориҷӣ ва фарҳанги Туркманистон, роҳбарон корпуси дипломатӣ ва ташкилотҳои байналмилалӣ, зиёиён, мақомотҳои Туркия, хабарнигорон, соҳибкорон ва шаҳрвандони Тоҷикистон иштирок намуданд.

Сафири Тоҷикистон Фаррух Ҳомиддин Шарифзода чорабиниро ифтитоҳ намуда, иштирокчиёнро бо таърихи 20-солагии Рӯзи Ваҳдати миллӣ, ҷашни Рӯзҳои фарҳангии Тоҷикистон дар Туркманистон ва эълон гардидани соли 2017 Соли ҷавонон шиносоӣ намуд. Дар баромадаш Фаррух Шарифзода қайд кард, ки Рӯзҳои фарҳангии Тоҷикистон дар кишвари дӯстонаи Туркманистон дар арафаи барои мардуми кишвари мо чорабинии муҳим, Рӯзи 20-ум солгарди Ваҳдати миллӣ, ки як иди муқаддас барои ҳар як шаҳрванди мамлакати мо ҳисоб мешавад, баргузор мегардад.Ин ҷашн, нишони пирӯзии сиёсати созанда ва хирадмандонаи Ассосгузори сулҳ ва Ваҳдати миллӣ - Пешвои Миллат, Ҷаноби Олӣ, Президенти кишвар муҳтарам Эмомалӣ Раҳмон мебошад.  Ин рӯз, оғози марҳилаи нав дар таърихи Тоҷикистон, нуқтаи ҳисоби давраи нави рушди босуръат ва шукуфоии кишвари мо шуд. Имрӯз, бист сол мешавад, ки мардуми Тоҷикистон дар шароити сулҳ ва   суботи пойдор ба корҳои эҷодӣ машғуланд.

Сипаси, Муовини Девони Вазирони Туркманистон Аннагелди Гараджаев аз номи Президенти Туркманистон муҳтарам Гурбангули Бердимухамедов табрикот ва таманиёти неки худро ба Ассосгузори сулҳ ва Ваҳдати миллӣ - Пешвои Миллат, Ҷаноби Олӣ, Президенти кишвар муҳтарам Эмомалӣ Раҳмон, Ҳукумат ва мардуми тоҷик бахшида ба таҷлили 20-солагии Рӯзи Ваҳдати миллӣ ва Рӯзҳои фарҳангии Тоҷикистон дар Туркманистон расонид.

Зимни зиёфат, барномаи рангин консертии ҳунармандони шинохтаи тоҷик, бо рақсҳои дилошӯб, сурудҳои замонавии класикӣ ва таронаҳои халқӣ табъи меҳмонҳоро хушу болида гардонид.